Cəmiyyətimizdə subay oğlanların boşanmış qadınla evlənməsi, əsasən, qəbul edilmir. Amma ənənəni pozan, metalitetə zidd olan istisnalar da mövcuddur. Əsasən, yaşlı və qismən orta yaşlı nəslin qəbul edilməz hesab etdikləri bu məsələ daima müzakirə obyekti olub. Ümumilikdə Azərbaycan cəmiyyətində bu məsələyə yanaşma birmənalı deyil.

Bəs boşanmış qadının subay oğlanla evlənməsi doğrudurmu?

Gundem.az xəbər verir ki, mövzu ilə bağlı Sfera.az-a danışan psixoloq Ləman Məmmədova bildirib ki, bu mövzu müzakirə obyektinə çevrilməməlidir.

“Ailə quran kişilər evlənəcəyi xanımı öz istəyi və iradəsi ilə seçməlidir. Ona ətraf rəylər maraqlı olmamalıdır. Əgər bir kişi boşanmış qadını sevir, amma nə deyərlər düşüncəsi ilə evlənmirsə, həmin şəxs yetkin bir fərd kimi qərar qəbul edə bilmir. Daim başqalarının düşüncəsinə görə yaşasaq, xoşbəxt olma ehtimalımız azalır".

Psixoloq qeyd edib ki, bəzi oğlanlar isə valideynlərinin həmin şəxsi qəbul etməyəcəyini düşünürlər.

“Təbii ki, evlilikdə valideynlərin razılığı önəmli faktordur. Amma bir kişi sevdiyi qadına tam sahiblənməli, evlənərək onu xoşbəxt edəcəyini valideynlərinə inandırmalıdır. Dövrümüz günü-gündən dəyişir. Artıq bu kimi hallar qınaq obyektinə çevrilməməlidir. Ailə quran şəxslərin azalmasının səbəbi də boşanan şəxslərin yenidən ailə qura bilməməsiir. Cəmiyyətdə boşanmış qadına olan baxış fərqlidir. Lakin bu, düzgün yanaşma deyil. Həmin qadının hansı səbəbdən boşandığını kimsə bilə bilməz. Heç kim həyatından sığortalanmayıb”.