Quba rayonu, Dəyanət İsmayılov adına Çiçi kənd tam orta məktəbinin valideynləri məktəbdə işıq və istilik sistemlərinin olmaması səbəbindən narahatlıqlarını dilə gətiriblər.

Gundem.az xəbər verir ki, valideynlər bu səbəbdən uşaqlarını dərsə göndərməkdən imtina edirlər.

Sakinlər bildirirlər ki, keçən il məktəb tikildikdən sonra bir müddət sevinsələr də hal-hazırda vəziyyət dəyişib. "Dekabr ayı gəlib, hava soyuyub. 4-5 gündür uşaqları məktəbə buraxmıram, çünki xəstələnirlər".

Məsələ ilə bağlı Quba-Xaçmaz Regional Təhsil İdarəsindən verilən açıqlamada isə bildirilib ki, məktəb istilik sistemi kombi vasitəsilə təmin olunur. Lakin təhsil müəssisəsinin elektrik enerjisi ilə təchizatı ilə bağlı sənədləşmə məsələlərində problem yaranıb.

"Bu səbəbdən istiliklə təminatda müəyyən fasilələr yaranıb. Hal-hazırda məsələ ilə bağlı müvafiq qurumlarla birgə işlər görülür və problemi tezliklə həll etmək üçün tədbirlər görülür".