"Rusiyanın son qərarı ilə birlikdə 2022-ci ilin oktyabr ayı Ukraynanın və bu ölkənin Rusiya tərəfindən işğal edilmiş ərazilərinin taleyi baxımından çox kritik olacaq. Ümumiyyətlə dünya 2022-ci ildə son 60 ilin ən kritik oktyabr ayını yaşaya bilər". 

Gundem.az xəbər verir ki, bunu politoloq Araz Aslanlı bildirib. Ekspert 60 il öncəyə belə nəzər salıb:

"60 il öncə ABŞ-ın SSRİ-ni nüvə silahları ilə çevrələmə strategiyasına SSRİ də qarşılıq verməyə çalışmışdı. SSRİ bu məqsədlə Kubaya nüvə başlıqlı raketlər və onları atmaq üçün sistem yerləşdirmək planını reallaşdırmaq üzrə olarkən ABŞ-ın kəşfiyyat təyarələri oktyabrın 14-də Kuba ərazisində şübhəli obyektləri müəyyən etdi. 22 oktyabrdan etibarən ABŞ Kubanı tam (o cümlədən okeandan) mühasirəyə aldı və SSRİ gəmilərinin Kubaya keçişinə imkan vermədi. İki tərəfin də bir-birini nüvə silahı ilə hədələdiyi gərginlik qarşılıqlı güzəştlərlə başa çatdı.

ABŞ SSRİ-yə yaxın ərazilərdəki NATO müttəfiqlərinin (Türkiyə daxil olmaqla) ərazisinə onların xəbəri olmadan yerləşdirdiyi nüvə başlıqlı raketləri geri apardı. SSRİ də Kubaya nüvə başlıqlı raket yerləşdirmə planını dayandırdı. 1962-ci ildəki "oktyabr gərginliyi" kiçik dövlətlərin maraqları nəzərə alınmadan böyük dövlətlərin qarşılıqlı razılığı ilə başa çatmışdı. Amma bundan kiçik dövlətlər xüsusi bir zərər də görməmişdilər.
Ümid edək ki, 60 il sonra növbəti "oktyabr gərginliyindən" ümumilikdə dünya, xüsusi halda isə Ukrayna zərərlə çıxmasın".
İnci