Ukrayna prezidenti Volodimir Zelenski ABŞ-a səfəri çərçivəsində bu ölkədə müalicə alan ukraynalı hərbçilərlə görüşüb.

Gundem.az Ukrayna mətbuatına istinadən xəbər verir ki, o, Nyu-Yorkdakı universitetlərin birinin nəzdində fəaliyyət göstərən xəstəxanaya baş çəkib.

Zelenski müxtəlif əzalarını itirmiş 9 ukraynalı əsgərin müalicə və reabilitasiya kursu keçməsi ilə tanış olub. Ukrayna prezidenti yaralıları mükafatlandırıb:

"Düşməni məğlub etməyinizi gözləyəcəyik. Sağalın, qayıdın. Biz qalib gələcəyik".

Xatırladaq ki, ötən ilin 24 fevralında Rusiyanın Ukraynaya hücumu nəticəsində başlayan müharibə davam edir. Rusiya Ukraynanın Xerson və Zaporojye vilayətlərini, habelə qondarma "Donetsk XR" və "Luqansk XR" separatçı qurumlarını birtərəfli qaydada ilhaq etdiyini açıqlayıb.