Rusiyanın Kaspi Strateji Tədqiqatlar İnstitutunun elmi işçisi Aleksandr Karavayev “Kavkazskiy uzel” nəşrinə açıqlamasında bildirib ki, Azərbaycan üçün Rusiya “sülhməramlı” kontingentinin statusunun hərbi sülhməramlı qüvvədən monitorinq qrupuna dəyişdirilməsi, ona müəyyən polis funksiyalarının verilməsi ilə bağlı danışıqların aparılması məntiqli ola bilər.

Onun bu fikirlərinə cavab olaraq hərbi ekspert Ədalət Verdiyev Metbuat.az-a açıqlamasında bildirib ki, Azərbaycan heç bir halda sülhməramlı kontingentin ölkəmizdə qalma müddətini uzatmaq niyyətində deyil:

“Əslində onların Azərbaycandakı indiki fəaliyyəti də qismən formal xarakter daşıyır. Çünki onların Azərbaycana yerləşdirilməsində məqsəd münaqişə tərəfləri arasında atəşkəs rejiminə əməl olunmasına nəzarət etməkdən ibarət idi. Hazırda münaqişə tərəflərindən biri tamamilə Azərbaycan ərazilərindən çıxarılıb və belə olan halda da rus kontingentinin yerinə yetirə biləcəyi vəzifələr tamamilə aradan qalxıb”.

Rusiya sülhməramlı kontingentinin polis və ya digər funksiyaları yerinə yetirməsi üçün heç bir mandatının olmadığını xüsusilə qeyd edən ekspert vurğuladı ki, onların Azərbaycan ərazilərindən çıxarılması hətta nəzərdə tutulan müddətdən də əvvəl baş verə bilər:

“Qarşıda rus kontingentinin heç bir müqavimət potensialı mövcud deyil. Onlar heç bir addım da ata bilməzlər. Azərbaycan öz fəaliyyətlərini Rusiyada hansısa sərsəm politoloqların səsləndirdiyi fikirlər əsasında deyil, milli və dövlət maraqları çərçivəsində planlaşdırır və həyata keçirir”, - sitatın sonu.