Türkiyə oktyabrda ən çox təbii qazı Rusiya, ABŞ və Azərbaycandan alıb.

Gundem.az “Anadolu” agentliyinə istinadən xəbər verir ki, bu barədə Türkiyə Enerji Bazarını Tənzimləmə Qurumunun oktyabr ayı üzrə “Təbii Qaz Bazarı Sektoru Hesabatı”nda qeyd edilib.

Belə ki, ümumi təbii qaz idxalı oktyabr ayında əvvəlki ilin eyni ayına görə 15,2 faiz artaraq, 4 milyard 657 milyon kubmetrə çatıb. Boru kəmərləri və 1 milyard 634 milyon kubmetr mayeləşdirilmiş təbii qaz (LNG) qurğuları vasitəsilə təqribən 3 milyard 22 milyon kubmetr idxal həyata keçirilib.

Rusiyadan 1 milyard 865 milyon kubmetr, ABŞ-dan 838 milyon kubmetr, Azərbaycandan isə 762 milyon kubmetr təbii qaz idxal edilib.

Bu dövrdə Rusiya və Azərbaycandan idxal müvafiq olaraq 8,8 faiz və 30,9 faiz azalıb, ABŞ-dan qazın həcmi isə 748 faiz artıb.