“Rusiya bu il Azərbaycan ilə əməkdaşlığı daha da inkişaf etdirməyi planlaşdırır”.

Bunu Rusiyanın Azərbaycandakı səfiri Mixail Boçarnikov mətbuat konfransında deyib.

“Rusiya siyasi əlaqələri inkişaf etdirməyi, hökumətlərarası komissiyalar çərçivəsində fəaliyyəti aktivləşdirməyi planlaşdırır”, - səfir bildirib.

O xatırladıb ki, bu il Azərbaycan və Rusiya arasında diplomatik münasibətlərin qurulmasının 30 illiyi qeyd olunacaq: "Bu ildə həmçinin Rusiya və Azərbaycan arasında iqtisadi əməkdaşlıq üzrə Hökumətlərarası Komissiyanın 20-ci yubiley iclası keçiriləcək. Bu iclas zamanı əməkdaşlığın inkişafı ilə bağlı müxtəlif aktual məsələlərin müzakirə olunacağı gözlənilir. Əminəm ki, yüksək səviyyədə görüşlər də keçiriləcək”.

M.Boçarnikov müxtəlif razılaşmaların, sənədlərin imzalanacağına ümidvar olduğunu bildirib: "Regionda vəziyyətin sabitləşdirilməsi istiqamətində işlərin davam etdirilməsi də planlaşdırılıb. Prinsipcə, 2022-ci il üçün planlar çox genişdir”/Report.

Səfirin sözlərinə görə, Rusiya hesab edir ki, "3+3" formatı regionda iqtisadi əlaqələrin və etimadın inkişaf etdirilməsinə töhfə verəcək: "Burada əsas maraq regionda vəziyyəti sabitləşdirmək və kommunikasiya əlaqələrini bərpa etməkdir.."3+3" formatında iştirak üçün qapı daim Gürcüstanın üzünə açıqdır”.