“Gülmək çox əla bir hissdir. Kim nəyə gülürsə, əslində, yaxşıdır. Gülməkdən gözəl nə var ki?”

Gundem.az bu sözləri Ölkə.Az-a açıqlamasında aktyor və şoumen Fərda Xudaverdiyev komediya janrı sahəsindəki vəziyyət barədə danışarkən deyib. Komediyanın intellektual olub-olmaması barədə müzakirələrə münasibət bildirən aktyor deyib ki, kim nə bacarırsa, onu edir:

“13-15 yaşlar hər şeyə gülən vaxtlardır. Onlarla bizim işimiz yoxdur. Amma həyata atılandan, qayğılar artdıqdan sonra, yaşa dolduqca daha dərin yumor axtaranlar var. Onlar da haqlıdırlar. Hər kəs nəyi bacarırsa, onu edir. Kimin publikası nəyə gülür, bizim ona qarışacağımız yoxdur. Sadəcə, bir istəyimiz var ki, ilk ağla gələn zarafatlardan qaçmaq lazımdır. Çay evlərində, məclislərdə edilən zarafatları efirə çıxarmamaq lazımdır”.

F.Xudaverdiyev onu başqa stəndapçılarla, bəzən Cem Yılmazla müqayisə edilməsi ilə bağlı deyilənlərə isə belə cavab verib:

“Bunu sırf stəndapla məşğul olanların hamısına arzu edirəm. 90 milyonluq qardaş Türkiyənin Cem Yılmazı ilə müqayisə olunmaq böyük bir lütfdür. Amma mən beyin olaraq özümüzü nə Cem Yılmazdan, nə də filankəsdən daha kiçik hesab edirəm. Əksinə, daha üstün olduğumuzu düşünürəm”.

F.Xudaverdiyev Xalq artisti Afaq Bəşirqızının “Azərbaycanda komediya yoxdur” sözlərinə də münasibət bildirib:

“Araşdırsanız, görərsiniz, bütün dövrlərdə bu problem olub. Tarixdə yalnız keyfiyyətli iş görənlər qalır. Həmişə belə olacaq. Dünyasını dəyişəndən sonra kimisə tərifləməyə nə var ki? Allah bizi reallığı görə-görə inkar edənlərdən, qəlbinin gözü kor olanlardan saxlasın”, - deyə o söyləyib.

Qeyd edək ki, Xalq artisti Afaq Bəşirqızı bundan əvvəl saytımıza açıqlamasında Azərbaycanda komediya olmadığını demişdi.