Türkiyə 13 ildən sonra Ərəb Liqası Xarici İşlər Nazirləri Şurasının iclasına qatılacaq.

Gundem.az Türkiyə mediasına istinadən xəbər verir ki, Ərəb Liqasının (DBK) Xarici İşlər Nazirləri Şurasının sabah Qahirədə keçiriləcək 162-ci iclasına Türkiyə də dəvət olunub.

Xarici işlər naziri Hakan Fidanın açılış iclasında çıxış edərək Qəzza başda olmaqla regional məsələlərə, həmçinin Türkiyə-Ərəb Liqası əlaqələrinə toxunacağı bildirilir.

Sonuncu dəfə Türkiyə 2011-ci ildə Ərəb Liqasının toplantısına qatılıb.

Xatırladaq ki, son illərdə Türkiyənin bir neçə ərəb dövləti ilə münasibəti pisləşmişdi. Bu dövlətlər arasında Səudiyyə Ərəbistanı, Misir, İraq və Suriya kimi önəmli ərəb dövlətləri var idi. Atılan addımlar hesabına Türkiyənin Suriya istisna olmaqla, adıçəkilən digər ərəb ölkələri ilə münasibətləri normallaşıb.

Bu normallaşma prosesi yenidən əlaqələrin yaxşılaşmasına, diplomatik təmasların artmasına səbəb olub. Ərəb Liqasının iclasına Türkiyənin dəvət edilməsi də bunun bir əlamətidir.