Yayın gəlişi ilə istirahət mərkəzləri, kurort və sanatoriyalara üz tutan insanların sayında artım müşahidə olunur. İstirahətə öz hesabına gedənlər də var, dövlət hesabına göndərilənlər də.

Bəs kimlər dövlət hesabına yəni pulsuz istirahətə gedə bilər? 

Gundem.az Milli.Az-a istinadən xəbər verir ki, bu 2 yolla mümkündür: Azərbaycan Həmkarlar İttifaqları Konfederasiyasının xətti ilə və Sosial xidmətlər agentliyi vasitəsi ilə. 

Güzəştli şərtlərlə göndərişi necə almaq olar? 

Güzəştli və ya pulsuz kurort verilməsi Nazirlər Kabinetinin 406 və 128 saylı qərarları ilə tənzimlənir. Bu sənədlərə əsasən, işləməyən, əlilliyi olan şəxslər, 18 yaşınadək əlilliyi müəyyən edilmiş uşaqlar, ikinci dünya müharibəsinin iştirakçıları, işləməyən şəhid ailəsi üzvləri, Çernobil əlilləri və onların ailə üzvləri, digər imtiyazlı şəxslər sanarotiya, kurort yollayışı ilə təmin edilir. 

Bəs həmin şəxslər hara müraciət etməlidir?

Məsələ ilə bağlı Sosial Xidmətlər Agentliyinin Departament Rəhbəri Azər Rzayev bildirib ki, sanatoriya-kurort putyovkası ilə təmin olunmaq məqsədilə növbəyə alınmaq üçün Nazirliyin tabeliyində Dövlət Tibbi-Sosial Ekspertiza və Reabilitasiya Agentliyinin yerli filiallarının sanatoriya-kurort müalicəsinə göstərişinə əsasən regionlarda Nazirliyin tabeliyində Sosial Xidmətlər Agentliyinin regional filialına, Bakı şəhəri və Abşeron rayonunda isə müvafiq DOST Mərkəzinə müraciət edə bilərlər.  

Azərbaycan Həmkarlar İttifaqları Konfederasiyası da vətəndaşlara güzəştli istirahət imkanları yaradır. Amma, bu yalnız ittifaqın üzvü olan şəxslər və onların ailə üzvlərinə şamil olunur. Bu göndərişləri almaq üçün vətəndaşlar Konfederasiyasının kurort-turizm mərkəzlərinə müraciət edə bilərlər. Mərkəz İçərişəhərdə Sabir küçəsi 7 ünvanında yerləşir.