Daşınmaz əmlakın sığortalanması məsələsi hələ də ölkəmizdə populyarlıq qazanmayıb. Məhz bu səbəbdən yanğın, subasma və digər səbəblərdən əmlakları ziyan görərkən vətəndaşlar çıxılmaz vəziyyətdə qalırlar. Halbuki, daşınmaz əmlakın sığortalanması vətəndaşı bir sıra xoşagəlməz hadisələrdən və qayğılardan xilas edir.

Təbii ki, bu məsələdə maarifləndirmənin aşağı səviyyədə olması da öz sözünü deyir.

Ölkənin regionlarında yaşayanların çoxu daşınmaz əmlakın icbari sığortası barədə məlumatlı deyil və bu növ sığortaya pul verməyi itki hesab edir. Bu mənada daşınmaz əmlakın icbari sığortası ilə bağlı əhalinin maarifləndirilməsi tədbirləri davamlı olaraq həyata keçirilməlidir.

Nəzərə alaq ki, daşınmaz əmlakın icbari sığortası elektron qayda da həyata keçirilə bilir.

Gundem.az xəbər verir ki, mövzu ilə bağlı Bizim.Media-ya danışan Azərbaycan Sığortaçılar Assosiasiyasının ekspert qrupunun üzvü Emil Ağabağırov bildirib ki,  daşınmaz əmlakın sığortalanması elektron qaydada aparmaq mümkündür:

“Necə ki sözügedən metod avtomobillərin sığortalanmasında tətbiq edilir. Vətəndaşlar istənilən vaxtda sayta daxil olaraq əmlaklarını icbari sığorta edə bilərlər. Üstünlük odur ki, bunu cəmi 24 saat ərzində etmək mümkündür.

Elektron qaydada icbari sığorta etdirmək qaydası

Belə ki, vətəndaş elektron qaydada məlumatları yükləyir. Sığorta yazıldıqdan sonra ödənişlə bağlı telefona bildiriş kodu gəlir. Bundan sonra vətəndaş bildiriş koduna əsasən terminallarda və yaxud bank mobil tətbiqlərində ödənişi həyata keçirir. Beləliklə də sığorta müqaviləsi icra edilmiş olur.

Bu gün yazılmış müqavilə axşam saat 24-dən etibarən qüvvəyə minmiş olur. Bu sistem əmlakın sığortalanması prosesini sadələşdirir. İnsanlar bu sistem vasitəsilə sığortalayacağı daşınmaz əmlakın qiymətini də əvvəlcədən öyrənmiş olur”.