Xanımların çoxu bəzi səbəblərlə yeni doğulmuş körpələrinə ana südü verməkdən imtina edirlər və süni qidalardan istifadə edirlər.

Bəs süni qidalar körpələr üçün faydalıdırmı?

Gundem.az xəbər verir ki, mövzu ilə bağlı Sfera.az-a danışan pediatr Aynur İsmayılova bildirib ki, ana südü körpə orqanizmi üçün ən ideal qida hesab olunur.

“Ana südünün tərkibində 400-ə qədər mikroelement mövcuddur. Ana südü körpə orqanizmi üçün qoruyucu vasitələrdən biridir. Bu südün tərkibində olan karbohidratlar körpələrdə mərkəzi sinir sisteminin inkişaf etməsinə kömək edir. Tərkibində olan lizosim təbii antibiotik hesab olunur. Bu da orqanizmə düşən yad maddələrin zərərsizləşdirilməsində çox böyük rol oynayır. 1 yaşına qədər körpələrə mütləq ana südü verilməlidir. Əgər anada hər hansısa bir xəstəlik varsa, bu zaman süni qidadan istifadə edilməlidir. Lakin heç bir problem olmadığı təqdirdə süni qidaya keçmək məsləhət görülmür. Birinci növbədə ana öz düzgün qidalanmasını təmin eməlidir. Ana südü ilə övladını qidalandıran analar qazlı sulardan, fastfood qidalardan uzaq durmalı və bol maye qəbul etməlidirlər”.

Həkim qeyd edib ki, süni qida seçərkən də bir sıra məqamlara diqqət yetirmək lazımdır.

“Qida seçən zaman onun qiymətinə deyil, qablaşdırılmasına və saxlanma şəraitinə fikir vermək lazımdır və həkimlə məsləhətləşmək lazımdır. Əgər uşaqlarda qusma, allergiya varsa, hipoallergian qidalardan istifadə edilir. Ana südü ilə qidalanan uşaqlara 6 ayından sonra əlavə qidalar vermək olar”.