Cənubi Koreya Prezidenti Yun Sok Yolun tərəfdarları dövlət başçısına qarşı impiçmentə etiraz olaraq aksiya keçiriblər.

Gundem.az TASS-a istinadən xəbər verir ki, aksiya iştirakçıları Konstitusiya məhkəməsinin binasının qarşısında saçlarını keçəl qırxıblar.

Aksiyaya qoşulanlar arasında qadınlar da olub. Onlar Konstitusiya məhkəməsindən prezidentə qarşı impiçment prosedurunu ləğv etməyi və onun səlahiyyətlərinin bərpa edilməsini tələb edirlər. 

Bildirilib ki, Cənubi Koreyada başın qırxılması sona qədər mübarizə aparmaq əlaməti hesab edilir. 

Xatırladaq ki, Yun Sok-Yol müxalifəti qiyama yönələn fəaliyyətdə günahlandıraraq ötən il dekabrın 3-də gecə saatlarında ölkədə fövqəladə hərbi vəziyyət rejimi elan edib. Dekabrın 3-dən 4-nə keçən gecə məsələ parlamentdə səsverməyə çıxarılıb və prezidentdən hərbi vəziyyətin ləğv olunmasını tələb edən qətnamə qəbul olunub. Nəticədə dövlət başçısı təxminən 6 saat davam edən hərbi vəziyyət rejimini ləğv etmək məcburiyyətində qalıb. Dekabrın 14-də isə Koreya parlamenti Prezident Yun Sok-Yola impiçment elan edib. Konstitusiya məhkəməsi Yun Sok Yolun ya vəzifəsində qalmasına, ya da impiçmenti təsdiq etməyə dair qərar verəcək. Məsələyə baxılması 6 aya qədər davam edə bilər.