Ermənistanın məşhur yazıçısı od püskürdü:\"Ruslar işğalçıdır, ümidimiz onadır...\"
Ermənistanın tanınmış yazıçılarından biri olan Karen Antaşyan Rusiya, Azərbaycan torpaqlarında müvəqqəti yerləşdirilmiş sülhməramlı kontingent haqqında sərt ifadələr işlədib.
Gundem.az xəbər verir ki, yerli media yazıçının İrəvanın əsas dostu olan Moskvanı yıxıb-sürüməsini Azərbaycanın "Qisas" əməliyyatı ilə əlaqələndirib.
Antaşyan deyib: “Ermənistan Respublikasının mövcudluğunda maraqlı olan hər bir erməninin yadda saxlamalı olduğu bir neçə sadə həqiqəti dilə gətirəcəyəm. Ruslar sülhməramlı deyillər, rus işğalçıdır! Rusiya Ermənistanın strateji dostu da deyil. O, bütün aspektlərdə Ermənistanı müstəmləkə etməyə çalışan imperiyadır. Ermənistan Rusiya üçün xristian, qardaş ölkə, strateji tərəfdaş da sayılmır. Ölkəmiz Rusiyanın əlində siyasi və strateji resursdur, zərurətdən asılı olaraq onunla oynamaq, istifadə etmək bu və ya digər şəkildə qurban vermək olar. Türkiyə bizim düşmənimizdir, amma Rusiya da dediyim kimi dostumuz deyil".
Erməni cəmiyyətinə sərt mesajlar ünvanlayan yazıçı onu da vurğulayıb ki, özünü millətçi adlandıran, radikal türk nifrəti mövqeyindən çıxış edən, eyni zamanda "Rusiya qardaşlığını" aktiv şəkildə təbliğ edən erməni siyasi birlikləri Rusiya agentləridirlər. Onlar özlərinin yekun hesabatlarını Rusiya xüsusi xidmət orqanlarına göndərirlər. Qonşularına bağışlanmaz, amansız, radikal nifrəti təbliğ edən istənilən siyasi birlik də agent yığnağıdır. Onun sözlərinə görə ölkə daxilində cəmiyyətin radikal qütbləşməsinə səbəb olan siyasi və sosial layihələrdə də açıq-aşkar qərəzlilik var.
"Ermənistan Respublikasının siyasi elitası bütün dövrlərdə bu və ya digər dərəcədə Rusiyanın maraqlarına xidmət edib. Üstəlik kim ki, digərinə qarşı yerli səviyyədə radikal dözümsüzlük göstərir, bir-birini gözdən salmaqla, məhv etməklə məşğul olur o da Rusiyanın əlində qeyri-qanuni oyuncağa çevrilir. Bəs bizi imperiyanı siyasi oyunlarında daha əlverişli olmağa sövq edən təvazökar qərbçilik, türkofobiya, ruslara şikayətsiz sədaqət nümayişi xilas edə bilərmi? Yox, heç vaxt. Resurs heç vaxt rəğbət oyatmaz. Biz onlar üçün resursuq...
Türklərlə və ya başqa bir siyasi qütblə dostluğumuz bizi Rusiyanın təsirindən azad edib, suverenliyimiz və təhlükəsizliyimizin dərəcəsini artıra bilərmi? Yenə də yox! Acı təcrübə göstərib ki, belə bir durumda bütün ölkədə sabitlik, ümid, suverenlik itib batacaq. Bu, ölkəni on il geriyə atmaq deməkdir. Ən çox ümid edə biləcəyimiz şey əsas siyasi oyunçular arasında onların maraqlarının tarazlaşdırılması və mübadilə mühitinə çevrilməkdir. Bunun üçün mümkün qədər çox oyunçunun maraq obyektinə çevrilmək lazımdır. Bu strategiyanın uğuru isə o zaman mümkündür ki, Rusiya ümidsizcə zəifləyib diqqətini bizdən yayındırsın. Yaxu da güclü, texnoloji cəhətdən inkişaf etmiş, yüksək mədəni və elmi suverenliyə malik tərəfdaşa sahib olmağın zəif, sınmış, dağıdılmış, qüdrətli bir tərəfdaşdan daha sərfəli olduğunu başa düşsünlər. Daha biz geridə qalmış, assimilyasiya olunmuş vilayət kimi olmayaq. Belə ideyaya xüsusilə rus əsilli tanınmış ermənilər xidmət göstərməli, məlum gündəmi ön plana çıxarmalıdırlar. Bu, xərçəng xəstəsini xilas etmək üçün olan ümid kimi bir şeydir. Bədxassəli bir şiş xoş xassəli hala gələrmi, bilmirəm. Ancaq ölməmək, assimilyasiya edilməmək yaxud da gec və ləyaqətlə ölməmək üçün daimi səylər vacibdir”, - yazıçı ölkəsinin ruslara bağlı olan gələcəyinin qaranlıq olduğunu gizlətməyib.
Turqut
Son xəbərlər
Ən çox oxunanlar
- Bu gün
- Bu həftə
- Bu ay