Pekin Seysmoloji Agentliyinin mütəxəssisləri Asiya ərazisində növbəti bir neçə ildə baş verəcək güclü zəlzələlərlə bağlı narahatedici bir proqnoz veriblər.

Gundem.az xəbər verir ki, mütəxəssislər 150 illik seysmik məlumatları araşdıraraq gələcəkdə çox ciddi dağıdıcı zəlzələlərin Çin və qonşu ərazilərdəki bölgələri təsir altına alacağını bildiriblər.

Tədqiqatçılar Asiya və xüsusilə Çin ərazisində baş verən yeraltı təkanları izləyərək növbəti illərdə bu ərazilərin daha güclü zəlzələlərə məruz qalacağı qənaətinə gəliblər. Bu nəticələr xüsusilə Çin, Tayvan, Yaponiya və digər Asiya ölkələri üçün ciddi təhlükə yaradır.

Mütəxəssislər həmçinin Rusiyanın zəlzələ təhlükəsi ilə üzləşən bölgələrinə də diqqət çəkiblər. Fizika və Riyaziyyat üzrə elmlər doktoru Aleksey Zavyalov Rusiyada zəlzələlərdən ən az təsirlənən bölgələrin siyahısını təqdim edib. Onun sözlərinə görə, Moskva şəhəri yeraltı təkanlardan qorunur, çünki bu şəhər xüsusi tektonik mövqeyə malikdir və burada zəlzələlərin baş verməsi ehtimalı çox azdır.