“Qız qaçırma adam oğurluğudur, hansısa istisna yoxdur”.

Gundem.az xəbər verir ki, bunu Sfera.az-a açıqlamasında Daxili İşlər Nazirliyinin Mətbuat xidmətinin rəisi Elşad Hacıyev deyib. O qeyd edib ki, kimsə nikaha məcbur edilə bilməz.

“Qadağandır, məsuliyyət yaradır. Bərdə rayonunda adam oğurluğu faktına görə cinayət işi qaldırılıb. Oğurlanan 2001-ci təvəllüdlü şəxs polis əməkdaşlarının çevik müdaxiləsi ilə tapılaraq ailəsinə qaytarılıb”, - Hacıyev əlavə edib.

Xatırladaq ki, Bərdədə 23 yaşlı qız evlənmək məqsədilə qaçırılıb. Hadisə rayonun Uğurbəyli kəndində qeydə alınıb.

Kənd sakini 2001-ci il təvəllüdlü S.A. səhər saatlarında işə gedən zaman avtomobil yolunun kənarından həmkəndlisi 45 yaşlı Fərhad Rzayev tərəfindən evlənmək məqsədilə qaçırılıb.