Milli Məclisdə regionlarda olan sahibkarlara beş mindən 50 minədək kreditlərin daha asan və sürətli şəkildə verilməsi təklif edilib. 

“Qafqazinfo” xəbər verir ki, bunu Milli Məclisin İqtisadi siyasət, sənaye və sahibkarlıq komitəsində “Dövlət-özəl tərəfdaşlığı haqqında” qanun layihəsinin müzakirəsi zamanı deputat Rüfət Quliyev bildirib.

O vurğulayıb ki, Azərbaycanda möhtəşəm tikintilər, İdman Olimpiya kompleksləri, stadionlar, aeroportlar var, lakin onların səmərəli şəkildə istifadə olunmur: “Yeni qanun layihəsi qəbul olunarsa, keçmişdə tikilən, amma bu günə qədər heç bir effekti, səmərəsi olmayan infrastruktur obyektlərinə şamil olunacaqmı?”

Rüfət Quliyevin sözlərinə görə, Azərbaycanda fermerlər kredit almaq istəyəndə, onlardan o qədər sənəd istəyirlər ki, krediti alınca məhsul mövsümü bitir: “Sahibkar isə məhsulsuz qalır. Təklif edirəm ki, kiçik məbləğli kreditlər xüsusi proqramla verilsin. Məsələn, 25 min manata qədər kreditlər 2 həftə ərzində ayrıla bilər”.