“Dəfələlərlə parlamentdə məsələ qaldırmışam ki, dövlət orqanlarının biznes fəaliyyəti ilə məşğul olmasına konstitusiya imkan vermir. 

İndi hörmətli Musa müəllim deyir ki, yox, belə deyil. Əslində investisiya qoymaq biznes fəaliyyətidir. Konstitusiyanın 59-cu maddəsi “azad sahibkarlıq hüququ” adlanır. Onun ikinci hissəsini olduğu kimi oxuyuram: 

“Dövlət sahibarklıq sahəsində yalnız dövlət maraqlarını, insan həyatının və sağlamlığının müdafiəsi ilə bağlı tənzimləməni həyata keçirir”. Tənzimləmə ilə biznes fəaliyyəti fərqli anlayışlardır”. 

Cebhe.info xəbər verir ki, bunu deputat Qüdrət Həsənquliyev parlamentin bugünkü plenar iclasında deyib. Deputat qeyd edib ki, bu investisiya nə qədər az riskli sahələrə qoyulsa da bütövlükdə bunun batma ehtimalı var: 

“İkincisi də dövlət orqanı büdcədən də hər il vəsait alır. Məsələn, 2023-cü ildə 1,5 milyard manata yaxın Dövlət Sosial Müdafiə Fonduna vəsait ayrılır. Belə çıxır ki, biz büdcədən vəsait ayırırıq ki, bu insanların sosial təminatı həyata keçirilsin, amma bunu investisiyaya yönəldəcəklər. Burada məntiq varmı? Əgər həqiqətən də, ora çox vəsait yığılsa, büdcədən bir manat vəsait almasalar, bunu başa düşmək olar. 

Burada dünyadan nümunələr gətirilir ki, təcrübədə var. Amma biz bilirik ki, xaricdə özəl sosial sığorta şirkətləri var. Qanunla bizdə əslində dövlət belə şirkətlərin yaradılmasını stimullaşdırmalıdır. Amma bu istiqamətdə heç bir addım atılmır, heç bir iş görülmür”.