Məşhur aktrisa Ancelina Coli ilə eşq yaşadığı iddia edilən britaniyalı reper Akala başqa qadınla görüntülənib. 

Gundem.az xəbər verir ki, bu barədə "Daily Mail" məlumat yayıb. 

Bildirilib ki, Akala Londonun “Rosewood” otelində Milad şənliyinə kino prodüseri Şanel Nyumanla birlikdə qatılıb və onu sevgilisi kimi təqdim edib. 

Bununla da o, Coli ilə münasibəti haqqında şayiələri aradan qaldırıb.  

Qeyd edək ki, 49 yaşlı Ancelinanın özündən 9 yaş kiçik reperlə eşq yaşaması xəbərlərini gündəmə gətirən Akalanın instagramda Colini izləməsi olub. 
 

Daha əvvəl 62-ci Nyu-York Film Festivalında birlikdə görüntülənən cütlük aktrisanın ev sahibliyi etdiyi bir təşkilatın tədbirində yenidən bir araya gəlib. 

Eyni zamanda, Ancelinanın bu ilin avqustunda Akala ilə İtaliyada oteldən çıxarkən görüntülənməsi onların sevgili olduğu iddialarının doğruluğunu gücləndirib. 

Cütlüyə yaxın bəzi mənbələr ikilinin bir ildən artıqdır görüşdüyünü, Akalanın Colinin qızları Şilo və Zahara ilə ötən ilin mayında tanış olduğunu iddia edib. 

Xatırladaq ki, Ancelina Coli 2014-cü ildə Bred Pittlə ailə qurub, 2019-cu ildə boşanıblar. Ancelinanın 22 yaşlı Maddoks, 20 yaşlı Paks, 19 yaşlı Zahara, 18 yaşlı Şilo və 16 yaşlı əkizlər Noks və Vivyen adlı uşaqları var.