Xalq artisti Ağadadaş Ağayev "Medera Hospital"ın mühafizəçisi Nurəddin Cəlilovla barışmasından danışıb.

Gundem.az Teleqraf.com-a istinadla xəbər verir ki, o, barışıq addımı atmasının səbəbini açıqlayıb.

“Hər kəsin başına gələn hadisələrdən biridir. Mən tanınmış bir insan olduğum üçün bu hadisə şişirdildi. Bu haqda mediada məlumat yayımlanmasaydı, vəziyyət bu səviyyəyə gəlməzdi. Məni ən çox ailə üzvlərim sıxışdırdı ki, gərək bu hadisəni törətməzdin. Mən ailəmin sözünə dəyər verən insanam. Ona görə də məsələnin başqa həll yolunu tapa bilməzdim. Bu isə ancaq barışmaqla öz həllini tapa bilərdi.

Nurəddin Cəlilov da ailə başçısıdır, nəyə görəsə uzun müddət burada olmayıb. Qoy bundan sonra ailəsinin yanında olsun. Artıq bildiyiniz kimi, barışıq elan edildi və bu məsələ öz həllini tapdı. Əslində, mən barışığı gözləmirdim. Allah bağışalayandır, eləcə də ailəmin sözünü yerə salmadım. Məndə mərhəmət hissi də çox böyükdür. İstəmədim ki, bioqrafiyamda belə bir mənfi hadisə qalsın", - o bildirib.

Xatırladaq ki, tərəflər arasında hadisə ötən ilin iyul ayında baş verib.

Ağadadaş Ağayevin mübahisə etdiyi Nurəddin Cəlilov və müğənninin atdığı baltanın dəydiyi xadimə Nəzakət Paşayeva xalq artistinin cinayət işində zərərçəkən qismində tanınıblar.

Onun mübahisə etdiyi Nurəddin Cəlilov barəsində də cinayət işi açılıb.

Ağadadaş Ağayev Cinayət Məcəlləsinin 221.3-cü (xuliqanlıq,silah qismində istifadə olunan əşyalardan istifadə etməklə törədildikdə) maddəsi ilə təqsirli bilinir.

Bu gün hadisə ilə bağlı növbəti məhkəmə prosesi baş tutub.