Prezident Rəcəb Tayyib Ərdoğan ötən həftə 10 fərqli siyasət şurasına ümumilikdə 140 nəfər təyin edib. Məşhur sənətçi Orhan Gencebay və "Yeşilçam"ın əfsanəvi simalarından Hülya Soydan (Koçyiğit) Prezident Ərdoğan tərəfindən Mədəniyyət və İncəsənət Siyasətləri Şurasına üzv təyin olunublar. Yiğit Bulut isə yenidən İqtisadiyyat Siyasətləri Şurasına üzv seçilib.

Gundem.az xəbər verir ki, bu təyinatlardan sonra siyasət şuralarının üzvlərinə 101 min lirə maaş veriləcəyi ilə bağlı iddialar yayılıb.

Sözügedən iddialardan sonra Prezident Administrasiyasının Kommunikasiya İdarəsinin Dezinformasiyaya Qarşı Mübarizə Mərkəzi açıqlama yayıb.

Açıqlamada bu iddianın doğru olmadığı vurğulanaraq "Bəzi mətbuat orqanlarında yayımlanan "Prezidentlik Siyasət Şurası üzvlərinə aylıq ən azı 101 min lirə maaş veriləcək" iddiası həqiqəti əks etdirmir" , - deyilib.

Həmçinin bildirilib ki, Prezidentlik Siyasət Şurası üzvlərinə hər hansı ödəniş edilmir və ictimai rəyə təsir etmək məqsədi daşıyan bu cür iddialara inanılmaması tövsiyə olunur. /Millii.Az