London İmperial Kollecinin alimləri müəyyən ediblər ki, ispanaq, kələm və brokoli kimi yarpaqlı göyərtilərdə olan fol turşusunun qəbulunun artırılması kolorektal xərçəng riskini 7% azalda bilər.

Gundem.az xəbər verir ki, nəticələr The American Journal of Clinical Nutrition (AJCN) jurnalında dərc olunub.

Tədqiqatda 70 mindən çox insan iştirak edib. Alimlər gündəlik istehlak edilən fol turşusunun (vitamin B9) miqdarının bağırsaq xərçənginin (kolorektal xərçəng) inkişaf ehtimalına necə təsir etdiyini öyrənməyə çalışıblar. Əvvəlki araşdırmalar göstərib ki, hər 260 mikroqram fol turşusu bu növ xərçəngin inkişaf riskini 7% azaldır. Bu miqdar sözügedən vitaminin tövsiyə olunan gündəlik qəbulunun 65%-nə (400 mikroqram) uyğun gəlir.

Məlum olub ki, fol turşusunun kolon xərçənginin inkişaf riskini azaltma qabiliyyəti insan genomunun müəyyən bölgəsində, xüsusən üçüncü xromosomun 3p25.2 bölgəsində baş verən dəyişikliklərlə bağlıdır. Bu transformasiya kolorektal xərçəngin qarşısını alan müəyyən mexanizmləri işə salır. 

Alimlər qeyd ediblər ki, B9 vitamini ispanaq, kələm, brokoli, günəbaxan tumları, tam taxıllar, paxlalılar, həmçinin meyvələr, xüsusilə sitrus meyvələri kimi qidalarla zəngindir. Fol turşusu qida əlavəsi kimi də mövcuddur. Tədqiqatçılar həmçinin ümumi sağlamlıqda sabitliyi qorumaq üçün sağlam pəhrizin zəruriliyini vurğulayıblar.(unikal.az)