"Böyük Yeddilik" ölkələri (G-7) və Avstraliya Rusiyaya qarşı sanksiyalar halqasını bir qədər də daraltmaqla bağlı qərara gəliblər.

Publika.az xəbər verir ki, "G7"-yə daxil olan dövlətlər və Avstraliya Rusiya neftinə qiymət həddi tətbiq etmək barədə razılıq əldə ediblər.

Məlumata görə, Böyük Britaniya, Almaniya, İtaliya, Kanada, ABŞ, Fransa, Yaponiya və Avstraliya şimal qonşumuzun neftinin "sabit qiyməti"ni müəyyən etmək barədə uzun çək-çevirdən sonra, axır ki, anlaşıblar.

Bildirilir ki, ümumi razılaşma olsa da, qiymət tavanı hələ tam şəkildə razılaşdırılmayıb.

Buna baxmayaraq, adıçəkilən 8 ölkə noyabrın sonuna qədər Rusiya neftinin "yeni qiymət"ini təyin edəcəklər.

İddialara görə, lazım gəldikdə bu qiymətə mütəmadi şəkildə yenidən baxılacağı güman olunur.

Adıçəkilən ölkələr bu anlaşmanın bazarın sabitliyini artıracağına xidmət edəcəyini vurğulayırlar. Eyni zamanda, "7+1" formatında təmsil olunanlar düşünür ki, rus neftinin "yeni qiymət düzəni" onun alıcılarının yükünü də minimuma endirməyə kömək edəcək.

Rusiya xam neftinin maksimum qiymətinin hansı səviyyədə təyin olunacağı isə hələlik məlum deyil.