Alimlər bildirirlər ki, koronavirus tamamilə məhv edilə bilməz və həyatımızda əbədi olaraq "endemik" durum kimi qalacaq.

Hazırda Avropada pessimist ab-hava hökm sürür və burada yoluxmaların sayına nəzarət çətinləşdiyi üçün Yeni il şənlikləri ləğv edilib.

Koronavirus yeni yayılmağa başladıqda bir çox insan peyvəndlərin mövcudluğundan sonra COVID-19-un əbədi olaraq yox olacağına ümid edirdi. Ancaq gözlənilənlərin əksinə oldu.

"Fred Hutchinson" Xərçəng Araşdırma Mərkəzinin epidemioloqu Dr. Elizabeth Halloran koronavirusla bağlı tədqiqatlardan danışarkən, virusdan qurtulmağın mümkünsüz olduğunu və vəziyyətin həmişəlik endemik olaraq qalacağını bildirib.

Əksər elm adamları virusun qeyri-müəyyən müddətə daha aşağı və daha çox proqnozlaşdırıla bilən sayı ilə dövr etməsini gözləyir və bu vəziyyət elmdə endemik vəziyyət adlanır.

"Pfizer" şirkətinin rəhbərləri isə keçən həftə koronavirusun 2024-cü ilə qədər endemik olaraq qalacağına inandıqlarını açıqlayıblar. Milli Allergiya və Yoluxucu Xəstəliklər İnstitutunun direktoru dr. Antoni Fauci isə keçən həftə yazmışdı ki, virusun məhv edilməsinin ehtimalı azdır və o, "dövri epidemiya və endemik xəstəlik" olaraq qalacaq.

Mütəxəssislər xəbərdarlıq edir ki, endemik xəstəliyə yoluxma qaçılmaz olsa belə, insanlar hələlik profilaktik tədbirlərdən əl çəkməməlidirlər./Sfera.az