Xalq artisti, tanınmış muğam ifaçısı Alim Qasımov həmkarı, Xalq artisti Zabit Nəbizadəni nəvəsinin toyuna dəvət etməyib.

 

Gundem.az xəbər verir ki, bu barədə Qaynarinfo-ya xanəndə Zabit Nəbizadə deyib.

 

"Çağırmayıb, getməmişdim. Allah xoşbəxt eləsin, mən hər toyda olmalı deyildim ki. Bununla bağlı çox adam deyir, amma mən nə deyə bilərəm. Sosial şəbəkələrdən eşitdim ki, deyib, toya çox istədiyim xanəndələri dəvət etmişəm. Burdan anlaşılır ki, məni istəmirlər. Mən Alim müəllimin tələbəsi olmuşam, eyni rayondanıq. Toy elə bir şeydir ki, hər gün gördüyün adamı belə unudursan, bir də toydan sonra ayılırsan ki, vay dədə, mən filankəsi toya çağırmamışam. Ola bilsin ki, mən onların qəlbində olmuşam, amma yaddan çıxmışam. Toyda adam nəyisə unuda bilir. Burada mən nə Alim müəllimə haqq qazandırıram,  nə də özümə. Unudula bilərəm, pandemiya elə vəziyyət yaradıb ki, doğrudan da unudula bilərəm. Mən belə düşünürəm. Bir də qarşıda gör nə qədər nəvələri var, ümid edək ki, onların toyuna çağıracaq. Çağırsa da sağ olsun, çağırmasa da".

 

Zabit Nəbizadə deyir ki, toya dəvət edilməməsi qətiyyən ona pis təsir etməyib:

 

"Çünki mən onun övladlarının toyunda iştirak etmişəm. Övladlarının toyunda paket də götürməyib. Heç kəsə icazə verməyib ki, toya pul salınsın. Nəvəsinin ad günü, kiçik toyunda iştirak etmişəm. Fikirləşdim ki, yəqin belə məsləhətdir, qismət deyil ki, mən orda iştirak etməmişəm".

 

Qeyd edək ki, fevralın 2-də Xalq artisti Alim Qasımovun nəvəsi Fatimə ilə "Natiq” ritm qrupunun rəhbəri, Xalq artisti Natiq Şirinovun oğlu Ümidin toy mərasimi keçirilib. 

 

Xatırladaq ki, Fatimə Əməkdar artist Fərqanə Qasımovanın qızıdır.