Türkiyənin Mersin şəhərində yaşayan 45 yaşlı Semiha Işıkın həyatı insanlar üçün nümunə olmalıdır. O, öz mübarizəliyi ilə ölümcül xəstəliyə qalib gəlib, həm də, xəstə anasını xilas etməyə çalışır.

Qeyd edək ki, Semiha ilk dəfə 2013-cü ildə süd vəzi xərçənginə tutulub. Xəstəliyini bildiyi gündən əhval-ruhiyyəsini pozmur və müalicə alır. Özünü xəstəliyə təslim etməyən qadın xərçəngə inamlı qələbə çalır.

Daha sonra 2020-ci ildə ikinci döşündə xərçəng aşkarlanır. Bu dəfə isə onu daha çətin və məşəqqətli mübarizə gözləyir.

Çünki o, həm həyat yoldaşından ayrılır, həm də anasının da xərçəng xəstəliyinə yaxalandığını öyrənir. Əməliyyata girən qadın, əməliyyatdan uğurla çıxır.

Bu dəfə o, həm anasının müalicəsinə nəzarət edir, həm də özü müalicəsini davam etdirir. Anasına qulluq etmək üçün işindən də çıxmalı olur.

“İnsan özü-öz həkimi olmalıdır. Bütün xəstəliklər kimi xərçəng xəstəliyinin də bir əlacı var. O da, müalicələrlə bərabər gərək yüksək əhval-ruhiyyədə olasan”, - deyən Semiha hər kəsə sağlamlıq diləyib.