“Moskva Bakı ilə İrəvan arasında danışıqlar prosesinin öz nəzarətində olmasını istəyir”.

Gundem.az bildirir ki, bunu politoloq Elxan Şahinoğlu deyib. Onun sözlərinə görə, Kremlin nəzarətindən kənar sülh prosesi onun maraqlarına cavab vermir. 

“Misal üçün, Ermənistanın Baş naziri Nikol Paşinyan Tavuş vilayətinin sakinləri ilə görüşündə bildirib ki, İrəvan sərhəd kəndləri məsələsində Bakıya güzəştə getməsə, o zaman həftənin sonunda müharibə başlaya bilər. Rusiya Xarici İşlər Nazirliyinin rəsmi nümayəndəsi Mariya Zaxarova isə diqqəti kəndlərin qaytarılmasının sülhə xidmət edəcəyinə yönəltmək əvəzinə, Paşinyanın “müharibə” ifadəsindən yapışıb. “Avropa Birliyi, NATO və Vaşinqtondan olan yeni kuratorlar işi görün hansı yerə çatdırdılar” deyə Zaxarova Paşinyanın bəyanatının Rusiya ilə heç bir əlaqəsi olmadığını vurğulayıb. O, Paşinyanın siyasətinin və açıqlamalarının qərblilərlə məsləhətləşmələrinin nəticəsi olduğunu deyib”.

Ekspert vurğulayıb ki, Paşinyanın son açıqlamalarının leytmotivi Ermənistana məxsus olmayan kəndlərin Azərbaycana qaytarılması ilə bağlıdır:

“Bu haqda isə Zaxarova və digər Rusiya rəsmiləri açıqlama vermirlər. Halbuki, 4 kəndin Azərbaycana qaytarılmasının Qərblə əlaqəsi yoxdur, bu, Nikol Paşinyanın qərarıdır. Çünki reallıq bunu diktə edir, üstəgəl bu şifahi razılaşma Rusiya Prezidenti Vladimir Putinin də 9 noyabrda Azərbaycan və Ermənistan liderləri ilə imzaladığı üçtərəfli bəyanatla əlaqəlidir”. (Sfera.az)