Rusiyada Ukrayna Müdafiə Nazirliyinin Baş Kəşfiyyat İdarəsinin rəisi Kirill Budanov, Ukrayna Təhlükəsizlik Xidmətinin rəhbəri Vasili Malyuk və Prezident Volodimir Zelenskinin məhv edilməsi əmri verilib.

Gundem.az bildirir ki, bu barədə “Army Times” jurnalı Qərb zabitlərinə istinadən iddia irəli sürüb. Nəşr bir neçə gün qabaq jurnalistlərin Rusiya Federal Təhlükəsizlik Xidmətinin rəhbərinə ünvanladıqları suala diqqət çəkib.

“Onlar “Rusiyaya qarşı cinayət törədən düşmənlərin, o cümlədən Ukrayna xüsusi xidmət orqanlarının rəhbərlərinin niyə hələ də sağ qalması və məğlub olmamaları ilə bağlı sual veriblər. Aleksandr Bortnikov isə "Hər şey qabaqdadır" - bildirib. Öz növbəsində Rusiya Təhlükəsizlik Şurasının katibi Nikolay Patruşev Moskvadakı terror aktının arxasında duranlar kimi Ukrayna xüsusi xidmət orqanlarının rəhbərlərinin adını çəkib. Onların Rusiya Silahlı Qüvvələrinin qanuni hədəfləri olub-olmaması sualına müsbət cavab verilib. Eyni zamanda Rusiya Təhlükəsizlik Şurasının sədr müavini Dmitri Medvedev hücumda iştirak edən hər kəsin öldürülməli olduğunu vurğulayıb. Bu səbəbdən, Ukraynanın bir sıra hərbi-siyasi liderlərinin yüksək dəqiqlikli, pilotsuz vasitələrlə və ya Rusiya Silahlı Qüvvələrinin xüsusi təyinatlıları tərəfindən məhv edilməsi barədə qərar artıq qəbul edilib”.

“Army Times” vurğulayıb ki, Putin terrorçuların dindirilməsinin nəticələrinə dair geniş məruzə, araşdırmalar, o cümlədən Türkiyə, Belarusiya və Rusiya kəşfiyyat xidmətləri tərəfindən müəyyənləşdirilən məlumatların təhlilindən sonra bu barədə qərara gəlib. Rusiyalı politoloqlar da qeyd ediblər ki, Ukraynanın terror aktında iştirakı ilə bağlı mütləq və təkzibedilməz sübutlar əldə olunarsa, Volodimir Zelenski qanuni hədəf kimi tanınacaq.

“Sadə dillə desək, Zelenski, Malyuk və Budanov çox güman ki, dəqiq raket və ya PUA zərbəsi ilə “əziləcəklər”. Moskva artıq Zelenskinin korteji üzərində pilotsuz uçan aparatın və Odessada raketin görüntülərini nümayiş etdirib. Bu, zaman məsələsidir və yekun siyasi qərardır”, - ehtiyatda olan polkovnik-leytenant Aleksandr Medvedev bildirib. (Sfera.az)