Xəbər verdiyimiz kimi, Azərbaycan kubokunun yarımfinal mərhələsində baş tutmuş “Neftçi”- “Qarabağ” derbisindən sonra “Ağ-qaralar”ın futbolçusu Qara Qarayevlə Ağdam təmsilçisinin fan klubu “İmarət” arasında qalmaqallı anlar yaşanıb.

Gundem.az xəbər verir ki, onlar Qara Qarayevi rəqib komandaya keçdiyi üçün təhqir ediblər. Q.Qarayev də azarkeşlərin təhqiredici şüarlarına cavab verib.

Bu hadisədən sonra bir çox futbolçular, tanınmışlar Qara Qarayevlə bağlı paylaşımlar edərək ona dəstək nümayiş etdiriblər. 

“İmarət” azarkeş qrupu isə “Facebook” səhifəsində futbolçunun təhqir edilməsinə haqq qazandıran paylaşım edib: 
 
“Qarayev, Qarayev, Qara Qarayev, “Qarabağ”ın igidi Qara Qarayev “vaxtı var idi bu şüarı səsləndirən də “İmarət” idi. Futbolçuya karyerası boyu ən böyük dəstəyi də elə azarkeşlər verir. Qara bizim sevimli futbolçumuz olub və geyindiyi formanın haqqını verib. Nə Qara, nə də başqa futbolçu ilə azarkeşin şəxsi ədavəti, prinsipi ola bilməz. O cümlədən, təhqirə məruz qala bilməz. Qara Qarayev əfsanəsi ola biləcəyi klubdan çıxıb həmin klubun əzəli rəqibi olan “Neftçi”ni seçəndə həmin klubun azarkeşlərinin də onu meydanda görəndə xoş qarşılamayacağına hazır olmalı idi.

Futbol ictimaiyyəti və özü Qarayevin keçidini peşəkarlıq adlandırırsa, indi də azarkeşin reaksiyasına peşəkar yanaşmaq lazımdır. Heç bir futbolçu və ya futbol adamı “İmarət” tribunasına yaxınlaşıb barmaqla heç kəsi hədələyə bilməz. Hədələyəcəksə, olacağı budur. Bəli, kaş ki olmayaydı. Ancaq olubsa, bu, tribunada da olub, bitib. Azarkeş necə tribunadakı hərəkətlərində emosional və çılğındırsa, bu stiuasiyada da eyni cür oldu. Qaraya dəstək olanlara da “Neftçi Arena”ya getməklərini məsləhət görürük. Futbolçuya stadionda dəstək olmaq lazımdı, sosial şəbəkədə yox”. (Sfera.az)