15 mart 2024-cü il tarixində “PAŞA Həyat Sığorta” ASC və “Baku City Residences” daşınmaz əmlak şirkəti arasında birgə əməkdaşlığa dair Anlaşma Memorandumu imzalanıb.

Gundem.az xəbər verir ki, imzalanan saziş çərçivəsində tərəflər öz fəaliyyət sahələrinə uyğun olaraq əməkdaşlıq əlaqələrinin formalaşdırılması və möhkəmləndirilməsi üçün məlumat və təcrübə mübadiləsi aparacaqlar.

Memorandumda sərmayə yığımları davamlı və sabit xarakter daşıyan şəxslər üçün yaşayış şəraitinin, daşınmaz əmlakın əldə edilməsi şərtlərinin yaxşılaşdırılması, əlavə imkanların və imtiyazların yaradılması kimi müddəalar da öz əksini tapıb.

Anlaşma Memorandumu çərçivəsində, “PAŞA Həyat” və “Baku City Residences” öz fəaliyyət sahələrinə uyğun olan müxtəlif istiqamətlər üzrə təcrübə və məlumat mübadiləsini, eyni zamanda ölkədə sığortanın təbliğ edilməsini, sığorta məhsulları barədə daha geniş kütlələrin məlumatlandırılması üçün maarifləndirmə və məlumatlılığın artırılmasını həyata keçirəcəklər. Bu əməkdaşlıq nəticəsində müştərilərin reinvestisiya imkanlarının yaradılması üçün yeni üfüqlər açılacaq. 

“PAŞA Həyat” haqqında 

“PAŞA Holding” şirkətlər qrupuna daxil olan “PAŞA Həyat” 24.11.2010-cu il tarixdə Azərbaycan Respublikası Vergilər Nazirliyi tərəfindən dövlət qeydiyyatına alınaraq Azərbaycan Respublikası Maliyyə Nazirliyinin 14.02.2011-ci il tarixli lisenziyası əsasında həyat sığortası sahəsi üzrə xidmətlərin həyata keçirilməsi istiqamətində fəaliyyət göstərir.

“PAŞA Həyat” dinamik inkişaf edən lider həyat sığortası şirkəti olmaqla hazırda Azərbaycan Respublikasının Sığorta qanunvericiliyi ilə nəzərdə tutulmuş həyat sığortası sinfinə aid olan bütün növ məhsulları müştərilərinə təqdim edir.

“PAŞA Həyat” İcbari Sığorta Bürosunun iştirakçısıdır.

“Baku City Residences” haqqında
“Baku City Residences” Azərbaycan daşınmaz əmlak bazarında özünəməxsus yerə və 10 il ərzində zəngin təcrübəyə malik olan bir brenddir.

Müasirliyi və komfortu özündə birləşdirən “Baku City Residences”, müştərilər üçün ehtiyac duyulan xidmətləri vahid məkanda əlçatan edir.

“Baku City Residences” qısa müddət ərzində düşünülmüş rahatlığı ilə seçilən “Baku City Residences Olimpik”, “Baku City Residences Khatai”, “Bayıl Bay”, “Yacht Club Residences”, “Şuşa Residences” kimi layihələrə imza atıb.