“Avropa İttifaqı (Aİ) iqtisadiyyatın daha da şaxələndirilməsi, ölkə daxilində iş yerlərinin yaradılması və inklüziv kənd inkişafının təşviqi istiqamətində dövlətin səylərinə töhfə vermək məqsədilə Azərbaycana 2 milyard avro ayırmağı planlaşdırır”.

“Qafqazinfo” xəbər verir ki, bunu Avropa İttifaqının Azərbaycandakı nümayəndəliyinin rəhbəri Piter Mixalko bildirib. 

O qeyd edib ki, bu vəsait investisiyalar İqtisadi İnvestisiya Planı çərçivəsində ayrılacaq: “Bu planla bağlı biz Azərbaycan hökuməti ilə daha sıx işləməyi nəzərdə tuturuq. Bu işin nəticəsi olaraq keçən həftə Azərbaycan hökuməti ilə yüksək səviyyədə işçi qrup yaratmışıq”.

Piter Mixalko, həmçinin qeyd edib ki, Avropa İttifaqı Azərbaycanıın bir nömrəli ticarət tərəfdaşıdır: “Azərbaycanın xaricə ixrac etdiyi məhsulların yarıdan çoxu Aİ ölkələrinə gedir”. 

Onun sözlərinə görə, hazırda 400-dən artıq Avropa şirkəti fəaliyyət göstərir: “Aİ Azərbaycanda kiçik və orta sahibkarlıq subyektlərinə də dəstək verməkdədir. İndiyə qədər biz 13 min sayda sahibkarlıq subyektinə dəstək göstərmişik. Bizim bu subyektlərimizə göstərdiyimiz dəstək nəticəsində onlar 63 milyon avro gəlir əldə edib. Həmin subyektlər tərəfindən 2 mindən çox iş yeri açılıb. Düşünürük ki, növbəti il ərzində bu rəqəmləri daha da artıra biləcəyik”.