ABŞ İsrailin Dəməşqə zərbə endirməsindən sonra İrana Yaxın Şərqdəki Amerika qüvvələrinə hücum etməməsi barədə xəbərdarlıq edib. 

Gundem.az xəbər verir ki, bu barədə Dövlət Departamentinin mətbuat xidmətinin rəhbəri Metyu Miller brifinqdə bildirib.
'Biz İran hökumətinə açıq şəkildə bildirdik ki, onlar bu hadisədən ABŞ qoşunlarına və ya ABŞ-nin bölgədəki obyektlərinə hücum etmək üçün bəhanə kimi istifadə etməməli, vəziyyəti gərginləşdirmək üçün heç bir addım atmamalıdırlar”, - o qeyd edib.

“Oktyabrın 7-dən biz eskalasiya riskindən narahatıq. Siz bizim eskalasiya riskini azaltmaq üçün davamlı olaraq diplomatiya ilə məşğul olduğumuzu görmüsünüz”, - Miller əlavə edib.

Xatırladaq ki, 2023-cü il oktyabrın 7-də Qəzza zolağından HƏMAS yaraqlılarının İsrail ərazisinə soxulmasından sonra Yaxın Şərqdə vəziyyət kəskin şəkildə pisləşib. İsrail vətəndaşları HƏMAS tərəfindən öldürülüb və ya girov götürülüb. Buna cavab olaraq İsrail tərəfi bu günə qədər davam edən “Dəmir Qılınclar” əməliyyatının başladığını elan edib. (Sfera.az)