Moldova Prezidenti Maya Sandu Rusiyanın Sankt-Peterburq şəhərində keçiriləcək Müstəqil Dövlətlər Birliyinin qeyri-rəsmi zirvə görüşündə iştirak etməyəcək.

“PRO TV” xəbər verir, bu barədə onun özü məlumat verib: “Mən bu zirvə görüşünə getməyəcəyəm. Bu cür tədbirlərə getməzdən əvvəl biz ölkə üçün gündəliyin aktuallığını təhlil edirik. MDB kontekstində bizi əsasən iqtisadi məsələlər maraqlandırır. Mən rəsmi dəvət almamışam və hətta zirvə toplantısının gündəliyi ilə tanış deyiləm”

Maya Sandu ölkəsinin NATO-ya daxil olmasını da istisna edib: "Bu, ölkə Konstitusiyası ilə qadağandır.Dövlətin əsas qanunu Şimali Atlantika Alyansına qoşulmağı qadağan edir. Biz bitərəf ölkəyik, əsas qanunu heç kim dəyişməyib, belə təşəbbüslər yoxdur, biz heç kimə hərbi təhlükə yaratmırıq, vəziyyətin sülh yolu ilə inkişafını istəyirik”/Report.

Qeyd edək ki, dekabrın 28-də Rusiya Prezidenti Vladimir Putinin təşəbbüsü ilə ənənəvi olaraq MDB üzv ölkələrinin dövlət və hökumət başçılarının qeyri-rəsmi görüşü keçiriləcək.

Tədbirdə Azərbaycan Prezidenti İlham Əliyevlə yanaşı, Belarus Prezidenti Aleksandr Lukaşenko, Ermənistan baş naziri Nikol Paşinyan, Qazaxıstan Prezidenti Kasımcomərt Tokayev, eləcə də ilk prezident, Elbaşı Nursultan Nazarbayev, Qırğız Respublikası Prezidenti Sadir Caparov, Özbəkistan Prezidenti Şovkat Mirziyayev, Tacikistan Prezidenti İmaməli Rəhman, Türkmənistan Prezidenti Qurbanqulu Berdiməhəmmədov iştirak edəcək.