Mamed və Məmməd adına 10 il əvvəl qadağa qoyulubmuş...
Məlum olduğu kimi, bir neçə gündür sosial şəbəkələrdə Azərbaycanda uşaqlara Mamed və Məmməd adlarının qoyulmasının qadağan olunması ilə bağlı məlumatlar yayılıb. Nazirlər Kabineti yanında Terminologiya Komissiyasına istinadən yayılan xəbərdə həmin adların vahid forması kimi Məhəmməd adının müəyyən olunduğu bildirilir.
“Qafqazinfo” xəbər verir ki, sosial şəbəkələrdə və bəzi mətbu orqanlarında trend olan xəbər əslində 8 il əvvəl yerli mediada yayımlanıb. Yəni həmin adların vahid yazılış forması illər əvvəl müəyyənləşib.
Məsələ ilə əlaqədar saytımıza açıqlama verən Nazirlər Kabineti yanında Terminologiya Komissiyasının sədr müavini Sayalı Sadıqova bildirib ki, Komissiya tərəfindən həmin adların vahid forması kimi Məhəmməd adı müəyyənləşib və qərarda hər hansı dəyişiklik yoxdur.
S. Sadıqova əlavə edib ki, Komissiyanın sözügedən adlara qadağa qoymaq kimi səlahiyyəti yoxdur: “Biz terminlərin, adların yazılış formalarına baxırıq, Terminologiya Komissiyasının ad verməyə, hansısa adı qadağan etməyə ixtiyarı yoxdur. Biz hansısa adı tövsiyə edirik. O da Komissiyanın üzvləri tərəfindən müzakirə olunur və ədəbi dilə uyğun yazılış qaydası müəyyənləşir. Çünki Muhammed, Mamed, Məmməd, Məhəmməd hamsı eyni kökdəndir və onlarla bağlı vahid yazılış qaydası formalaşmalıdır. Bu ad 2013-cü ilin orfoqrafiya lüğətində Məhəmməd formasında yazılıb. İndiyə qədər də qayda dəyişməyib”.
S. Sadıqova əlavə edib ki, bəzən Məhəmməd sözünün ərəb formasını - Muhammed, Gülüstan sözünü Qolistan və ya Saməd adını Samed kimi yazmaq istəyirlər. Bu halda qeydiyyat idarələri tərəfindən Komissiyaya məktubla müraciət olunur: "Ədəbi dil normalarına uyğun olmayanda, yazılış forması onları şübhələndirdikdə, qeyri-adi yazılış forması olduqda bizə müraciət olunur və biz də ədəbi dil normasını müəyyən edirik. Komissiyaya qeydiyyat idarəsindən hansı adla və yazılışı ilə bağlı müraciət olunursa, biz onu araşdırıb cavablandırırıq ki, ədəbi dil normalarına uyğun olaraq ad bu cür yazılmalıdır. Komissiyanın məqsədi adların düzgün yazılış formasına nəzarət etməkdir”.
Son xəbərlər
Ən çox oxunanlar
- Bu gün
- Bu həftə
- Bu ay